*1 اذاى تحسبى انتى حامل فى أد ايه؟

عرفتى انك حامل,لو فاكره أخر بريود جتلك امتى
يبقى تذودى 7 أيام على التاريخ اللى جتلك
فيه يعنى مثلا نفترض ان أخر بريود كانت 3 4 2015
يبقى نذود عال3 اسبوع
يبقى كل يوم 10 تدخلى شهر جديد
يعنى 10 5 شهر,10 6 شهرين وهكذا

طيب اذاى تحسبى ميعاد الولاده

سهله أوى زى ما قلنا نذود أسبوع عالأيام
هنذود 9 عالشهور اللى هما مدة الحمل
يعنى عالمثال اللى فوق
الأيام هتبقى 10 وشهر 4 هيبقى13 يعنى شهر
1 يناير
يبقى ميعاد الولاده 10 1 2016

امتى تقدرى تشوفى الحمل على جهاز السونار؟

لو هتعملى سونار مهبلى فيبان على 5 اسابيع حمل
وعرفنا هنحسب اذاى
لو تحبى تشوفيه بسونار عالبطن فهيبان على 6 اسابيع
حمل
واللى هيبان هو كيس الحمل ونشوف نبض الجنين

على ما تقدرى تروحى للدكتور تخدى ايه؟


ممكن تبقى حامل فى شهرين على ما تروحى للدكتور
فى الفتره دى ما أخدتيش أى حاجه

فاللى هتعمليه مجرد ما عرفتى انك حامل تخدى حمض الفوليك
وممكن كمان تخدى امبولات فيتامين ب 12
وأهمية حمض الفوليك انه بيبقى وقايه من تشوهات
الجهاز العصبى للجنين ونخده أول 3 شهور بالذات
لان دى الفتره اللى جسم الجنين عرضه أكتر لحدوث
تشوهات فيها
وعشان كده برده لازم نخلى بالنا أوى من استخدام
الأدويه فى الفتره دى من الحمل بالذات  

ايه اعراض الحمل اللى بتتاضيقنا واذاى نعالجها؟

طبعا الاعراض دى بتختلف من سيده لأخرى
لكن هحاول أقول الأعراض الأكثر شيوعا زى
1 القيء
ممكن يبقى ترجيع أو غممان نفس بس
وخصوصا الصبح أول ما تقومى من النوم
وده بيقل بعد أول 3 شهور
علاجه حسب شدة الحاله اما بناخد حقن
أو اقراص قبل الأكل ب 10 دقايق
وتقللى أكل المسبك والمقلى

2 حموضة المعده

ممكن تحسى بحرقان فى فم المعده
وخصوصا بعد الأكل
فاحنا الأول كوقايه ما تكليش وتنامى على طول
وقللى من شرب المنبهات زى الشاى والنسكافيه
وبرده تقللى اكل المسبك والمقلى
العلاج انا شخصيا بفضل الفوار زى رانى او غيرها
متاح برده اقراص أو شراب
وفى موضوع هعمله قريب ان شاء الله بيتكلم
بالتفصيل عن الأدويه المتاحه فى الحمل

3 المغص
وده برده من الاعراض الطبيعيه فى الحمل
وخصوصا فى أوله وممكن تخدى له اقراص

4 التهابات المهبل أو الجهاز البولى

ودى ممكن تتكر ر لاكتر من سبب
الاول ان مناعة المرأه الحامل تبقى أضعف
من غيرها فهى عرضه للميكروبات

وتانى حاجه ان أول 3 شهور بيبقى
الحمل فى الحوض وضاغط عالمثانه
وعشان ده ممكن تلاقى أعراض التهابات
المثانه زى تكرار دخول الحمام
وحرقان فى البول وأعراض تانيه

وبالنسبه للالتهابات المهبل فغالبا
بتبقى فطريه لانها بتيجى مع ضعف
مناعة المهبل وده زى ما قلنا طبيعى
فى الحمل ودى علاجها لبوس مهبلى
أو كريم موضعى على حسب الحاله

التهابات البول لما تلاقى الأعراض دى
تعملى تحليل بول وعلى أساسه
بيكون العلاج

5 اعراض أخرى زى الوحم والكلف

6 حساسية الجلد
ودى بنعالجها اما بكريمات موضعيه
أو اقراص اذا استدعت الحاله

7 الدوخه والصداع

نعرف السبب الأول يعنى نقيس الضغط
نطمن انه مش عالى أو منخفض
ونتأكد ان مفيش أنيميا شديده
هى اللى عامله الاعراض دى
والعلاج حسب السبب

دور المثبتات فى الحمل

جرت العاده ان الاطباء اذا كان ده أول حمل
أو حصل اجهاض قبل كده فيحبوا يكتبو مثبتات
ودى تركيبها هرمون بروجيستيرون وبيعمل استرخاء
لعضلات الرحم
وبرده بنخده فى حالات الاجهاض المنذر لا قدر الله
يعنى لما ينزل دم أول 3 شهور
فى الغالبا بنخده أول 3 شهور بس لان بعدها
بتتكون المشيمه وبتطلع الهرمون ده بكميات
كافيه وبالتالى مش هنبقى فى حاجه اننا نخده من بره
وطبيا اتضح انه مالوش اى دور الا فى الحالات اللى عندها
نقص فى الهرمون ده زى مع مريضات التكيس,
وده بنتاكد منه بتحليل نسبة الهرمون ده فى الدم  

هل أكلى هيذيد الفتره دى؟

مبدئيا اول 3 شهور مش محتاجه انك تذودى أكلك
خالص والمفروض وزنك ما يزيدش عن كيلو فى ال3
شهور ,انتى بس تختارى الأكل الافضل يعنى
تأكلى الحاجات اللى فيها حديد زى العسل الأسود
والتفاح والخضار والسبانخ والبلح والكبده بس مش
كتير
وتكلى الحاجات اللى فيها كالسيوم زى الجبن
والبيض وتشربى لبن